انت اكبر حمار

ظاهرة الافغانيين زادت وايد بالديرة

و اكثر شي في المناطق الخارجية .. و بالذات في صباح السالم .. و تحديدا في قطعة 5 حيث يكون بيتنا المبارك .. على كل حال في احد الايام اتفق الوالد مع ( افغاني ) علشان يسويلنه المواقف مالت البيت .. 0 طبعا الافغاني بصباح السالم اهو مقاول , كهربائي , ادوات صحية , زراع , ميكانيكي , حارس .. كل شي تبيه يصير

و طبعا بما ان وزارة المواصلات و البلدية مو مقصرين بالحفريات مع منطقتنه .. فنحتاج انبلط الباب من 3 الى 5 مرات بالسنة .. على كل حال اتفق معاه الوالد من غير علمي بالموضوع .. فلما قعدت كعادتي في تمام الساعة 11:20 صباحا ( قاعد مبجر ) سألت الافغاني .. ابكم اتفق معاك بابا .. جان يقولي 500 د.ك

انا اهني ثارت ثائرتي .. لأن صج نصب و احتيال اشكره .. فشبه تناجرت معاه .. و قضبته الباب .. و اخذت منه العربون و توكل على الله .. و بعد نص ساعة دق على ابوي و قام يتشكى مني .. و الوالد الله يهداه ( كلش مو عصبي ) فثارت ثائرته اهو بعد .. استلمني استلام مو طبيعي .. فثارت ثائرتي مرة ثانية و اتصلت على الافغاني و شخلته .. و من خلال كلامي معاه .. قلت له ( شنو 500 دينار انت حرامي ) الظاهر الاحرف التبست عند الافغاني .. و رد علي ( انا مو حمار .. انت اكبر حمار )

على فكرة .. انا يبت مقاول همشهري .. ايراني .. اتفقت معاه على 120 دينار .. لكن بعد ما خلص شغله اكتشفت اني دافعله 490 د.ك

فتذكرت كلام الافغاني ( انا مو حمار .. انت اكبر حمار )